打賭過百萬瀏覽 助理勝出放假一周 陳淑莊短片爆紅 找數成本高

打賭過百萬瀏覽助理勝出放假一周陳淑莊短片爆紅找數成本高

[2017.02.03] 發表

【明報專訊】𠵱家做議員都要講求人氣，公民黨陳淑莊(Tanya)舊年12月喺facebook上載一段立法會發言，一口氣鬧爆教育局長吳克儉，估唔到農曆年過後，呢段短片(圖)瀏覽次數竟然累積超過100萬次，連Tanya都估唔到吳局長咁旺場，幫佢呃到咁多page view！

多人睇自己嘅發言短片梗係高興，但Tanya話今次成本好高，𠵱家要「找數」，皆因佢嘅議員助理幫佢整呢條片之後，起初只有10幾萬次瀏覽，而Tanya口輕輕，話如果超過50萬次，就請一眾助理食自助餐做開年飯，結果無耐就到咗50萬。Tanya於是就亂吹，話如果過100萬次，就畀助理放假一星期，一心諗住無可能做到，點知助理喺農曆年假期間再幫手喺網上力推，估唔到噚日真係夠數，Tanya就話會「找數」，無得抵賴！

6分鐘短片狂數吳克儉工作表現

講番Tanya條片，長6分幾鐘，佢七情上面，一口氣狂數吳局長嘅工作表現，仲重溫吳局長金句，包括「日本食嘢好正、真係好正」，「東京有兩個公園好靚㗎」，當然仲有窒呀吳局長月讀30本書，叫吳局長不如寫番旅遊攻略書，又話想下屆政府有個「掂」嘅教育局長。Tanya仲喺fb話，「睇嚟今次要到你做生涯規劃」。

其實𠵱家功能組別議員都善用網絡及短片，好似保險界陳健波，早幾日上載一段同食物及衛生局長高永文對談嘅短片，內容唔係鬧人梗係無咁爆，但短片教大家新年飲茶消滯，講下健康知識，反應都算唔錯，短短幾日都有兩萬幾次瀏覽量。

更多港聞