今屆副局政助無外國籍 聶德權：有嘅正申請放棄

今屆副局政助無外國籍聶德權：有嘅正申請放棄

[2017.08.03] 發表

【明報專訊】商務及經濟發展局長邱騰華、副局長陳百里，政制及內地事務局長聶德權、副局長陳帥夫噚日齊齊出嚟見記者，兩個新副局長成為焦點，佢哋都一齊申報利益，講明自己現時無外國護照。聶德權補充話，《基本法》雖然無要求副局長同政治助理要放棄外國國籍，但因為大家關注，所以有外國國籍嘅副局同政助都申請咗放棄。

環境局為「失蹤」解畫

邱騰華噚日一開始唔係介紹自己個副局長陳百里，而係走去介紹隔籬局個副局長陳帥夫，佢讚帥夫人如其名咁靚仔，搞到Emily同一班行家笑唔停。到聶德權正式介紹陳帥夫時，就唔小心講咗陳帥夫係候任局長，再次引來大笑，而聶德權都兜得快，話「局長」用字喺未來式喎。

陳百里就喺商經局由政助升做副局長，但早前就有議員話唔識佢，陳百里回應話，佢以往都係同議員助理接觸比較多，議員未必識佢，強調未來會繼續做唔同嘅深化同游說工作。邱騰華都出嚟護航，話百里好勤力，會比佢更早出席一啲商會、專業界別嘅晚會，認識唔同業界人士。唔同政策局官員噚日都出嚟見記者，但環境局就放飛機，原定早上見記者但「失蹤」，局長黃錦星傍晚喺facebook出post補鑊，話佢哋問責團隊「工作浪接浪」，又有「早禱會」、又有準備施政報告、同青年交流喎。