率一帶一路團 葉太遊希臘探實習生
[2017.08.08] 發表
【明報專訊】立法會目前休會，唔少議員都趁機外遊休息一下，新民黨主席葉劉淑儀就寓工作於娛樂，早前率團考察「一帶一路」國家，其中一站去咗希臘，考察之餘，仲不忘同喺當地實習嘅香港學生喺海邊聚餐聯誼。可以望住希臘海景食飯，真係好悠閒呀。
葉太牽頭成立嘅海上絲綢之路協會，為大學生搵喺一帶一路國家嘅實習機會，而喺歐洲有40年歷史嘅一間地產公司，今年就收咗5個香港實習生，負責協助銷售工作，包括翻譯同接待等。
葉太喺facebook同大家分享靚相，話希臘人好識得享受生活，工作節奏比香港緩慢好多，文化同價值觀都同香港好唔同。
葉太仲話，此行同兩個香港實習生見面，兩人都話好享受喺碧海藍天、風景宜人嘅希臘生活。
更多港聞
相關新聞
