工會爭取數年 將常規化 消防周四辦紀念日悼殉職同袍

工會爭取數年將常規化消防周四辦紀念日悼殉職同袍

[2017.10.23] 發表

【明報專訊】香港市民對消防員嘅印象一向都好好，消防處喺1868年成立至今，有過不少英勇救人嘅事迹，但亦有前線人員不幸殉職。Emily就收到消息，工會爭取咗幾年之後，處方終於答應喺今個禮拜四(26號)，於將軍澳百勝角消防及救護學院首次舉辦紀念日，悼念殉職同袍，之後仲會常規化每年悼念一次，做法同另一支紀律部隊警務處看齊。

由於今年係第一次舉辦，消防處希望盡量低調，只會有簡單獻花儀式，表揚殉職同僚，邀請咗警察銀樂隊伴樂，唔會有大排場步操，成個過程大約30至40分鐘。

內部人員參加　暫不邀遺孀

有工會中人同Emily講，紀念日主要邀請消防處內部人員參加，當日除咗處長李建日外，仲有5個消防同救護工會主席會到場，但暫時唔會邀請遺孀。

工會又透露，以往喺尖沙嘴消防處總部，都有一本紀念冊畀大家簽名悼念，但新消防及救護學院落成後，有條件可以每年都辦悼念儀式。工會話處方呢個安排值得表揚，因為係對殉職同事嘅一份尊重。