張炳良下月返教大教書
[2018.01.27] 發表
【明報專訊】「前任行政長官及政治委任官員離職後工作諮詢委員會」噚日公布前運輸及房屋局長張炳良，以及前民政事務局副局長許曉暉離職後嘅工作。張炳良下月初會「返娘家」重操故業教書，將會喺教育大學擔任研究講座教授，以及喺科技大學任講者一職，到3月就會出任科大客座教授。
許曉暉任「沉香學會」主席
許曉暉就會喺下個月開始，擔任沉香學會有限公司董事同榮譽主席，亦會喺一口田慈善教育基金會有限公司，為《潮學香港歷史》擔任教育短片顧問。Emily都好奇，究竟沉香學會係乜東東，會唔會係智庫或研究組織，點知睇到個網頁介紹，原來真係旨在研究同埋學習沉香嘅文化，提倡並促進保育沉香樹同沉香產品，學會亦會舉辦沉香木識別、評級同欣賞研討會。
張炳良重返「娘家」教大教書，將會帶領公共行政範疇嘅學術研究活動；佢喺科大就會任教本科生同碩士生嘅公共行政科目，亦會為公務員提供訓練課程。
教大話，張炳良喺2008至2012年曾做過教大前身香港教育學院嘅校長，今次出任教大研究講座教授，定必有助推動學校研究文化，同埋提升教大喺相關領域嘅研究實力。
更多港聞
相關新聞
