【明報專訊】財政預算案公布海洋公園會派1萬張門票，公園噚日公布詳情，除?有得入園玩，仲有STEAM(科學、科技、工程、藝術及數學)活動畀同學仔參加，小學生會獲派「自然探索工具包」，有埋望遠鏡，方便探索園區內動植物生態；中學生就有得聽同STEAM有關嘅職業講座，認識如動物訓練員、工程師日常工作。 海洋公園主席孔令成話，希望活動幫到學生發掘對大自然嘅好奇心，又學到環境保育嘅職業知識。至於申請手續，海洋公園話已經將邀請函寄去全港中小學，每間學校最多可申請200張門票，中小生各有5000人受惠。報名由即日起至下月25日截止，有意申請嘅學校可上官網填表，除?基本資料，仲要介紹過往搞STEAM活動同環保自然教育成就、將來計劃等，經評審團隊評分，7月尾出結果。 另外，中學生有機會做「STEAM職業同輩互導大使」，由評分最高嘅十幾間學校提名學生參加工作坊，例如學照顧動物需要嘅科學知識，再由佢哋同其他同學仔分享知識。
|
| |
| |
