【明報專訊】慶祝回歸20周年活動陸續有來，文青們除咗可以選擇行博物館睇展覽外，7月1日、2日又多咗一個蒲點，就係由古物古蹟辦事處、發展局文物保育專員辦事處、元創方、香港古董及藝廊商會等合辦嘅「文物時尚•荷李活道」街頭嘉年華會，體驗荷李活道嘅歷史文化同藝術氛圍。 活動7日1日會先於元創方展開，除咗有創意攤位、特色工作坊同音樂表演，仲有地道小食可以醫肚。7月2日就會轉至鴨巴甸街至雲咸街一段嘅荷李活道，舉行長衫表演、街頭舞蹈、演唱、音樂表演、導賞團、寫生、工作坊等豐富活動。 除咗有得玩有得睇，遊客分分鐘仲可以有嘢拎，屆時位於荷李活道同摩羅上街嘅訪客諮詢中心將免費派發荷李活道小冊子、磁石貼，先到先得送完即止。 活動詳情可瀏覽發展局文物保育網頁(www.heritage.gov.hk)。
|
| |
| |
;)
