【明報專訊】候任勞工及福利局長羅致光(CK，圖)一直都係從事大學教育同研究工作，佢透露，原來曾經諗過退休之後轉行揸的士，「接觸多啲唔同嘅人仲好，自己又鍾意揸車」。𠵱家加入「熱廚房」，CK話都係喺唔同崗位服務社會；而自己雖然已經退出民主黨，但對民主黨仍然有感情。 CK噚日接受港台節目《千禧年代》訪問，提到以前喺大學工作，講嘢比較自由，「有信心就會講」，但自己就嚟要做問責官員、政府管治團隊一員，講嘢「要小心一啲」，因為言論係代表政府，「要尊重政府管治團隊」。 學者出身嘅CK話，明白社會對官員同學者係有唔同期望，對前者要求高、官員易受責難，理解局長一職「唔係一個吸引嘅工作」。佢認為，加入政府管治團隊最重要係可以參與決策層面。 至於組班安排，CK話需要留到7月1日上任後，由特首成立聘用委員會負責，𠵱家係言之尚早，亦唔方便討論具體安排。CK強調，班底一定由佢自己選擇，至於𠵱家係咪心中有數，佢就話唔方便表達。
|
| |
| |
;){kind=small}
;)
