大律師會辦中學生辯論賽?評判粒粒皆星
[2018.06.02] 發表
【明報專訊】香港大律師公會今日下晝會喺高等法院舉行中學生周年辯論比賽總決賽，決賽分為中文組同英文組，成功晉身決賽嘅學生係全女班，分別嚟自4間女子中學。決賽評判陣容鼎盛，有終審法院首席法官馬道立、律政司長鄭若驊，同埋身兼大律師嘅公民黨立法會議員楊岳橋等法律界專業人士。
中文組決賽嘅題目係「香港應放寬批准法律援助的門檻」，由協恩中學(正方)對撼德望學校(反方)，評判由終審法院常任法官鄧國楨、律政司長鄭若驊同公民黨楊岳橋擔任。
英文組決賽嘅題目同中文組一樣，對決學校分別係聖保祿學校(正方)對瑪利曼中學(反方)，評判團成員有終審法院首席法官馬道立、高等法院上訴法庭副庭長林文瀚同身兼大律師公會副主席嘅資深大律師毛樂禮。
呢個比賽由大律師公會舉辦，已經踏入第15屆。公會希望透過舉辦各種活動提高年輕人嘅法治精神意識。辯論比賽初賽同準決賽嘅辯論議題包括「香港應設立國歌法」、「香港不應從外地司法管轄區引入終審法院非常任法官」等。
更多港聞
相關新聞
