【明報專訊】唔少議員都會趁暑假外遊叉叉電，而資訊科技界議員莫乃光(Charles)同公民黨黨魁楊岳橋(AY)8月初會去美國矽谷，考察個幾星期，同當地嘅創科企業，如Google、Uber、Airbnb等高層見面，了解佢哋會唔會有興趣喺香港投資，同探討香港有咩不足，亦會向對方分享香港相關規管；另外，佢哋會同當地地方政府官員取經，汲取做智慧城市嘅經驗。 學習智慧城市經驗 AY話，特首林鄭月娥嘅施政報告聲稱會將影響創科嘅政策拆牆鬆綁，不過到𠵱家都未見到；另一方面，香港嘅競爭對手新加坡、台灣等就好進取，成日派官員向呢啲企業招商，反觀香港政府就唔夠積極。 Charles話，此行目的係為香港爭取更多國際投資、就業機會，之後會將收集到嘅意見帶番畀香港政府，但唔係代政府去做游說工作，政府未來應該自己去做。佢強調，會向企業提到香港喺中美貿易戰中可以成為緩衝地。另外，佢哋亦會出席兩個講座，同當地港人交流香港現時嘅政治、社會等情?。
|
| |
| |
;)
