【明報專訊】區議會選舉11月舉行，反修例風波令一批素人銳意出戰，唔少更希望同建制派元老、新星對撼。Emily近日聽聞，自由黨深水埗區議員李梓敬所屬選區九龍塘又一村，目前最少有兩人考慮出戰，包括曾經喺旺角大衝突案件中代表被告盧建民嘅大律師劉偉聰(Lawrence，圖)，以及教育大學社會科學系講師黎明(Minnie)。 對社會氣氛「嬲嬲地」 萌參選意念 Lawrence同Emily講，考慮參選念頭都係「十日八日」前先出現，因對近日社會氣氛「嬲嬲哋」，除咗每周遊行，都諗吓可以做啲乜，故萌生參選意念，而佢本身住又一村，萌生念頭時都未見有人出戰。Lawrence話仲未聯絡Minnie傾協調，認為邊個做都唔緊要，最緊要贏，但相信自己作為當區居民，同又一村聯繫會深過Minnie。Minnie就話仲未落實出戰邊區，但好大機會去又一村，若Lawrence打算選定會協調。佢話自己住元朗，故都會考慮喺元朗區出選。 面對挑戰，李梓敬似乎未驚過，佢同Emily講自己住又一村，近年都做咗好多個案，仲話歡迎多啲人一齊喺區內服務。面對今場反修例風波，佢話每屆都有獨特嘅政治形勢，唔係地區工作者能夠控制，只能不斷做嘢。
|
| |
| |
;){kind=small}
;)
