【明報專訊】唔少建制派認定反修例運動有外國勢力喺背後做洋指揮，唔少仲上載外籍人士喺現場嘅相片話係「證據」。民建聯立法會議員葛珮帆(EQ)前晚深夜就喺fb上載一段短片，話「暴徒指揮是外國人？！和陳志全有商有量？！」但片中「外國人」其實係防暴警外籍指揮官，結果惹嚟人民力量立法會議員陳志全同一眾網民揶揄，而EQ相信都好快知自己「點錯相」，一個鐘內極速刪post。 喺EQ一度上載嘅短片所見，「慢必」陳志全同「快必」譚得志等正同一個著深藍色衫，戴埋頭套，完全睇唔到樣貌特徵嘅男子溝通，該男子用英文話如果你哋去示威者嗰邊，你會知道佢哋做緊咩，但我哋唔會過去，會留喺呢度，其間就聽到快必、慢必回應「ok」。而片段只得7秒，睇唔到該男子嘅正面或全身，亦睇唔到片段前、後發生咩事。 Emily問過慢必，佢話上周六觀塘遊行時，有批參與者當時「跟大隊」行到去牛頭角警署附近，但該處唔屬遊行路線，結果就有「速龍」忽然出動，所以佢哋就行去同該名防暴警察指揮官講，示威者唔係要衝擊警察，只係蕩失路走咗過去，希望佢哋話畀示威者知遊行路線等，後來就出現片中嘅對話喇。
|
| |
| |
;)
