馬會助培訓教師 教青年規劃人生

[2015.04.20] 發表

【明報專訊】香港賽馬會資助「賽馬會青年生涯規劃」計劃，教年輕人規劃人生。呢個活動為期5年，目標對象係15至31歲嘅青年，今年9月正式開始，會培訓1300個老師同600個社工，另外喺學校同社區提供支援，料超過20萬青少年受惠。

賽馬會慈善及社區事務執行總監張亮話，佢哋都估唔到活動反應會咁熱烈，有超過150間學校報名，因時間同資源有限，所以有50間學校成為主要網絡學校，另外100間係結盟學校。

度身訂做課程供校本支援

呢項活動會幫每間網絡學校都度身訂做一套課程，提供校本支援，包括培訓老師、開展師友計劃、聯繫商界人士提供實習機會，另外都會幫結盟學校加強區內交流，希望學生可以透過呢啲計劃揀選適合自己嘅職業道路。

傳統名校聖若瑟書院係首階段參與計劃嘅網絡學校之一，校長陳美梅話，學校對各行各業嘅認知都唔夠，所以想透過呢個計劃，培訓老師點樣解答學生有關職業規劃嘅問題，幫學生結合個人興趣同能力規劃職業，知道唔係得醫生、律師先至係唯一出路。

佛教茂峰法師紀念中學校長陳志維話，佢哋學校係天水圍嘅普通中學，好多學生覺得家庭已經輸畀其他區嘅學生，佢希望呢個計劃可以令學生多接觸業界人士，產生希望。

更多港聞