阿信屋林偉駿收徒 3日咁多

[2015.10.14] 發表

【明報專訊】演員有藝訓班，行政總裁都有速成班。招聘網站CTgoodjobs最近舉辦「絕世筍工：見習CEO」比賽，由759阿信屋創辦人林偉駿、香港寬頻行政總裁楊主光，同超凡網絡聯合創辦人伍致豐親自揀蟀，優勝者可以跟佢哋返工實戰3日。林偉駿講明唔會錫住徒弟，自己有時忙起上嚟凌晨先收工，絕對唔係電視劇裏面嘅悠閒老細，徒弟咁啱揀中嗰啲日子，就要「頂硬上」。

有開工冇收工，係咪「筍工」見仁見智，但肯定林偉駿搵到個「絕世好員工」。佢嘅徒弟莊恩傑本身搞社企，習慣親力親為，希望學習開展一盤新生意，兼且穩中求變。

佢話3日實在太短，最好瞓醒就開工，直踩到瞓覺，咁就學到最多嘢。佢仲有計仔幫759「做大個餅」，例如，引入本地手作朱古力到網購平台，主打年輕嘅一代。

另外兩名優勝者蕭樂深同王文龍一樣躊躇滿志。滿腦創意、擁有YouTube頻道「深導遊」嘅樂深，聽爸爸話先嚟參賽，但無心插柳柳成蔭，希望跟伍致豐學吓管理生意。

王文龍就試過向內地廠商入貨被騙，雖然只係蝕咗1500元，但教訓好深刻，往後更謹慎。今次向楊主光偷師，話欣賞香港寬頻嘅宣傳方法同「以人為本」嘅經營哲學。