回憶掌教統局 自覺有改革責任 李國章曾被轟「要校長做乞兒」

[2016.10.25] 發表

【明報專訊】港大校委會主席李國章最近接受曾鈺成訪問時，大談當年出任教育統籌局長嘅過程，佢話當年自覺有改革香港教育發展嘅責任，所以「無法子唔接受責任」。但任內李國章受到批評，佢憶述當年因為提出大學配對籌款計劃，被斥計劃係要校長做乞兒，周圍問人搵錢。

話大學生一直都好激

李國章接受立法會前主席曾鈺成嘅商台節目《鈺成千里目》訪問，提到時任特首董建華邀請佢入局時，做緊中大校長嘅佢坦言，曾考慮做大學校長「舒服好多又高尚好多」，但覺得「自己咁多批評，到時又唔肯做，唔係好啱」，所以為咗教育發展同改革，最終都接受邀請。

李國章就任港大校務委員會主席時，引起唔少風波及學生衝突，佢話多年來嘅大學生一直都好激。佢話早喺回歸前港督彭定康委任佢做中大校長時，當時嘅大學生「一樣咁激」，指學生「瞓晒喺我架車前面」。

李國章又話，佢做教統局長時，時任財政司長梁錦松要求每個部門開支減10%，但要大學減開支係有困難，所以佢諗出「配對籌款」計劃，即係「大學籌款一蚊、政府資助一蚊」。佢話呢個計劃推出初期，被炮轟要校長做乞兒，但後來啲大學就話唔好取消個計劃。

更多港聞