吳君如取笑鍾意食雞……糊 鄭中基唔識唱舊愛千嬅《烈女》被噓
[2017.01.30] 發表
【明報專訊】鄭中基前晚大年初一舉行第2場紅館演唱會，吳君如、林敏驄擔任嘉賓。吳君如穿著紅色衫及黑色短裙亮相，形容是「金雞2.0造型」，與鄭中基合唱《財神到》及《肥婆隻雞甩晒毛》。之後鄭中基又孖林敏驄大玩棟篤笑，兩人大放笑彈。
文﹕娛樂組
任表演嘉賓的吳君如在台上跟鄭中基說﹕「睇番你啲片，扮男扮女都得，隻腳仲幼過我，你細個啲相似禽流雞，應該攞去人道毁滅。」她繼續笑指﹕「我剛識你時，你真係『無掩雞籠』，鍾意周圍食雞……糊！」全場觀眾爆笑。
君如又送上一隻肥雞公仔，與鄭中基在上面簽名，然後送給在場幸運觀眾。君如笑問他睇中邊個靚女？鄭中基笑言睇中好多，但老婆在場。君如又埋怨鄭中基不送飛給她，搞到女兒要企在角落位置睇；她還要自己畀錢，又來唱歌兼送雞。鄭中基笑說﹕「你這個年真係開得好！大家都知我很孤寒！」
林敏驄玩「林鄭入閘」
林敏驄與鄭中基合唱《最愛的你》，笑言「林鄭」終於入到紅館個閘，指自己與鄭中基。他又說羨慕鄭中基有把磁性聲音。
在點歌環節，有歌迷點唱鄭中基舊愛楊千嬅的《烈女》，鄭中基說不識唱，觀眾即報以噓聲，他叫大家不要噓。最後歌迷點唱《二月三日》(是楊千嬅生日日子)，他哼了幾句。
更多影視
相關新聞
