【明報專訊】立法會財委會主席陳健波自從上年開咗facebook專頁後，非常活躍網上世界，由評論政事到談論醫健資訊都有，好多時都有網民留言互動，佢前日就喺facebook發起網民聚會，喺下個星期六(12號)搞咗4場立法會導賞團，帶網民遊立法會，佢更加拍埋片吸引大家報名，而反應亦熱烈，短短一日已經有超過300人報名，波哥原本預計每場20人，佢話反應踴躍，會積極考慮加場咁話。建制派功能組別議員中，波哥似乎都算受歡迎。 波哥話，現時fb每個post都有大約5、6萬人睇，唔少留言都好正面，所以趁暑假都想同網民見面交流吓，於是決定搞導賞團，每節個半鐘，除咗帶大家參觀立法會外，仲會預留時間、訂埋地方同網民坐低傾吓偈。佢都估唔到反應咁好，原本預算一團20人，相信都會加至約30人一場，稍後亦可能再搞多團。 同網民見面呢類活動唔似功能組別議員會搞，波哥唔通有意轉戰直選？波哥就話如果後生15年都會考慮，但佢話直選並無令議員身分「增值」，相信無論直選定功能組別，最重要係真係做嘢。
|
| |
| |
