馬國明慶功宴攞老婆本抽獎 陳煒今年掙錢多買樓自住
【明報專訊】陳煒(煒哥)和馬國明雖然失落視帝、視后，但憑《宮心計2深宮計》奪「最受歡迎電視男、女角色」，同樣高興，2人前晚舉行慶功，筵開11席，宴請該劇台前幕後藝人和工作人員，並有抽獎助興，馬國明(馬明)更加碼自掏腰包5位數現金抽獎，笑言連老婆本都攞埋出來，要再儲錢才可以娶到黃心穎。
蕭正楠爆已婚馬明驚訝
馬明指煒哥是慶功宴食肆代言人，已有優惠價，他為表誠意，所以自掏腰包攞現金來抽獎，希望幕後工作人員可以抽中，因為每齣劇，幕後人員都很辛苦。問他準備多少錢？馬明笑笑口說：「都準備很多，視乎氣氛而加碼，先攞5位數字，老婆本都攞埋出來，要再儲過，所以沒阿蕭(蕭正楠)那麼快結婚。」
對於這幾年無綫頒獎禮他都與視帝無緣，只攞「最受歡迎電視男角色」，有否失望？他說：「我今年真的沒想過會攞獎，我和阿蕭、馬俊偉在《深宮計》中戲分很平均，三分一戲分都得獎，算超額完成。我沒想過得獎，嚇一嚇，被阿蕭突然宣布已婚又嚇一嚇，所以嚇到幾呆，有冇獎攞都是呆。(加把勁明年攞大獎？)攞獎要配合天時、地利、人和，算啦，已盡力，就算自己無獎都會出席，別人攞獎都開心，全部都是朋友。」
煒哥睇中觀塘新樓盤
煒哥請家人、朋友、契仔契女和廣告商一齊食飯慶祝。煒哥承認今年是掙錢最多一年，多了廣告和商辦活動，獲獎後也接了關於美容和頭髮的廣告。得獎後有否加價？煒哥說：「價錢不到我講，自己沒意願，我一直都好搲撈。」
有指她睇中觀塘一個400多呎，價值800多萬新樓盤單位，她承認，可惜未能趕及落票：「去睇樓當日星期六，星期日是台慶頒獎禮，星期一已截票，唯有等下輪放售，選址觀塘，因為近公司，我買來自住，因為現住的單位是租的。(是今年送給自己最大的禮物？)希望啦，都未買，會向這目標進發。」
記者：柯美
攝影：劉永銳
■更多娛樂猛料 ﹕ol.mingpao.com
