曾參與許仕仁七警案 蔡維邦任大律師公會副主席
[2019.01.03] 發表
【明報專訊】大律師公會每年都會改選正副主席同部分執委會成員，過去以自動當選為主，較少競爭，但去年罕有出現「撼莊」，成為法律界焦點，結果由戴啟思名單擊敗爭取連任嘅林定國名單。公會今年度嘅改選，氣氛就回復平靜，未有出現競爭，戴啟思自動當選連任主席，副主席彭耀鴻就退下火線，由擅長打刑事案嘅資深大律師蔡維邦(圖)接棒，而身兼民主黨黨員嘅大律師譚俊傑就晉身執委會。
為鄭若驊大宅僭建案給法律意見
大律師公會噚日向會員發出通告，交代正副主席、正副秘書同5個執委職位，都喺無競爭下自動當選，各人均由公會前主席李柱銘同陳景生提名。新任副主席蔡維邦近年參與多宗大案，包括新地許仕仁案、七警案同旺角暴動案等，佢最近亦為律政司長鄭若驊大宅僭建事件，向刑事檢控專員梁卓然給予獨立法律意見。
公會設兩名副主席，另一名副主席毛樂禮順利連任。新晉執委方面，除咗譚俊傑，仲包括資深大律師葉巧琦，大律師謝志浩、黃若鋒同梁寶琳。公會會員通告噚日亦交代會喺本月17日舉行年度大會，討論會務。
更多港聞
【明報專訊】民陣前日舉行元旦遊行，遊行人數較去年減少近半，各政團籌款嘅「吸金力」亦相應受影響。去年籌款最多、協助民主派人士打官司嘅「守護公義...
詳情
【明報專訊】唔少立法會議員近年都會喺facebook專頁分享小知識，好似保險界陳健波不時分享點樣養生，儲到一大班fans。建築、測量、都市規...
詳情
相關新聞
