羅賓威廉斯係沈祖堯恩師

[2014.08.18] 發表

【明報專訊】美國笑匠羅賓威廉斯(Robin Williams)日前自殺身亡，原來佢喺電影《暴雨驕陽》中飾演既基廷老師，令中大校長沈祖堯改變咗價值觀。沈祖堯噚日寫網誌話，基廷老師講過，醫學、法律等係崇高行業，支撐生活必需，但詩歌、藝術等先至帶畀大家活着嘅意義，呢句話令佢明白教育唔止傳授知識，亦唔應該引導學生追求高薪厚職，而要教佢哋熱愛生命同人類。

沈祖堯話自己2003年前一直教知識，好少教佢哋做個尊重生命、痛病人所痛、明知個病難醫都盡心照顧病人嘅好醫生，但睇完《暴》片後，決定花更多時間教學，親身示範點向病人表達關心，仲話睇咗《暴》片不下10次。亦因為基廷老師嘅說話，佢開始做曾經認為唔值得嘅事，好似聽病人心聲、與學生同行、為理想唔轉做私人執業，同埋拒絕外國嘅高薪厚職，至今毫不後悔。