【明報專訊】「企硬，唔take嘢」係政府禁毒宣傳嘅口號，不過警察都需要「T.A.K.E.」，當然唔係take嘢，而係「大型公眾活動中的心理裝備」課程簡稱，幫助吓處理遊行示威嘅警員平衡心理。立法會保安事務委員會文件顯示，警隊喺2013年12月起發展呢個課程，增加警察喺處理集會嘅心理質素；另外又披露舊年佔領運動期間，警方嘅職員關係課同埋心理服務課就send啲手機同網上短訊畀同事打打氣，教吓佢哋點樣自我調節情緒。 「T.A.K.E.」呢個課程至今已經有1300名警員接受訓練，舊年仲將課程錄製成45分鐘影片，放上警隊內聯網畀同事睇。點解叫「T.A.K.E.」呢？原來課程包含四大元素﹕「Treat your body照顧你的身體」、「Appreciate your role自我肯定」、「Know your people知己知彼」同「Endure hard feelings鍛煉情緒韌力」，4個元素頭一個英文字母夾埋就係「T.A.K.E.」啦。 佔領後為參與警員辦正向工作坊 佔領運動之後，警方人事服務及職員關係科就為7000個參與處理佔領行動嘅警員搞咗165場「正向工作坊」，鼓勵佢哋以正面心態總結佔領行動期間嘅情緒。
|
| |
| |
;)
