【明報專訊】特首梁振英(CY)就任內最後一份《施政報告》陸續約見唔同政黨，民主黨同公民黨等已表明杯葛，不過社民連梁國雄(長毛)噚日就單人匹馬去見CY。話說上年會面時，長毛一開場就讀公開信，要求CY交代UGL款項事件，又要求CY提出雨傘運動勾結外國勢力證據等，搞到會面不歡而散。今年長毛繼續帶番封舊信見CY，但佢一坐低先傾吓土地問題，又話自己支持樓市雙辣招，形容對方笑笑口。 邱騰華拒代收《成報》：唔關我事 不過，長毛隨後拎番封信準備讀嗰陣，佢話CY立即變臉，問長毛「係咪舊年個啲嘢」，再次拂袖而去，留低一班官員好錯愕。長毛感嘆，自己仲準備咗兩份《成報》頭版送畀CY，最後只能將報紙轉交特首辦主任邱騰華，點知對方話「唔關我事」。長毛直斥CY做人好小器，只係想聽啱聽嘅意見。 不過，長毛話今年待遇已比去年好，因為上年CY臨走時話，「佢(長毛)唔走叫警察抬佢走」，今年就任由自己留低。長毛話會場嘅「警察」仲答佢，「佢(CY)無講喔，你可以留」。 專業議政約11月見CY 而「專業議政」多名泛民功能組別議員噚日透露，約咗11月初見CY，就具體政策提出意見。會計界梁繼昌話，由於會面唔只係見特首，屆時仲有多個官員在場，所以想提出施政意見。
|
| |
| |
;)
