【明報專訊】今年初財爺畀咗超過2億等旅發局可以加碼宣傳香港，旅發局就拍咗4條廣告片，搵咗劉青雲、陳奕迅、黃敏德夫婦，同埋喺香港住咗超過20年嘅米芝連3星大廚Bombana，推銷香港嘅精彩體驗，話畀旅客知香港同其他旅遊城市唔同嘅地方。 4條片分為「美食、夜生活」、「時尚、娛樂及藝術」、「家庭旅遊」同「自然美景」。 旅發局主席林建岳話，起初構思條片時，唔想淨sell購物或者只播風景，因為買名牌全世界城市都有，所以要講到香港嘅古仔，佢就舉「時尚、娛樂及藝術」做例子，搵到幫陳奕迅做歌衫嘅新晉時裝設計師Anais Mak做主角，帶觀眾發掘香港時尚；背景拍到深水埗嘅花布街，就想sell埋香港嘅創意，因Anais嘅歌衫衣料都係嚟自深水埗。呢條片嘅Highlight就係陳奕迅出場，喺片尾著住Anais嘅歌衫開演唱會。 旅發局話，劉青雲幫手嘅「自然美景」噚日仲拍緊，而青雲好認真，搵埋教練教佢點跑步跑得靚。點解搵青雲？林建岳話青雲喺內地同亞洲都好紅，夠照。另外都有斟周潤發，初步發哥會幫手，但唔係今次宣傳，因全部明星都係拍膊頭唔收錢，所以要慢慢「碌卡」。 4條片會喺外國50幾個電視台同數碼媒體播，www.discoverhongkong.com已經睇到兩條片啦！
|
| |
| |
;){kind=small}
;)
