【明報專訊】港大民意研究計劃噚日公布最新十大立法會議員排名，離開新民黨、自組實政圓桌嘅田北辰(田二少)，今次一入榜就排首位，比前黨友葉劉淑儀排名高。要留意，民研話躋身「十大議員」先決條件係市民熟悉，然後再按支持度排名。 民調喺11月分兩階段做，立法會DQ事件後，前後已有6人喪失議員資格，而對比4個月前，田北辰、謝偉俊及梁美芬，取代劉小麗、梁國雄及周浩鼎進入十大。論相對排名，田二少以57.3分排名第一，葉劉第二(52.7分)，涂謹申第三(51.4分)；第4至10位都未夠50分，依次係謝偉俊、李慧琼、陳淑莊、朱凱廸、毛孟靜、梁美芬及蔣麗芸。 田二少就話，佢唔係成日可以入榜，今次一上榜就排第一都開心嘅，估計可能喺近期講過一啲言論或工作，令到受訪者記起及認同。佢又話做事但求無愧於心，有人認同佢嘅觀點更有滿足感。
|
| |
| |
;)
