【明報專訊】立法會環境事務委員會噚日討論野豬問題，唔係委員會成員嘅新民黨葉劉淑儀亦出席並發言，佢話有好強烈意見，透露最近某個星期日下午佢喺堅尼地道駕車，差啲撞到一隻突然衝出嚟嘅大野豬，好在後面無車，如果唔係實撞車。佢好肉緊咁話，「好危險㗎啲野豬唔守交通規則」，又話隻野豬好大隻，「分分鐘架車畀佢撞親」。佢又質疑政府要求市民舉報經常走出市區同滋擾市民嘅野豬，但係點知邊隻先至係。 建議仿效澳洲鼓勵獵殺 不過葉太又話明白點解啲野豬走出市區，話半山大量斬樹建屋，好似寶雲道起豪宅，野豬失去棲息地，所以走到市區搵食。佢話呢個情况仲會繼續，漁護署唔好慢吞吞幫野豬避孕同絕育，要諗啲有效方法，建議署方仿效澳洲政府鼓勵農民獵殺袋鼠。 何君堯問環境局副局長 點教野豬唔好亂過馬路 葉太提問後，委員會主席何君堯問環境局副局長謝展寰「點樣教育啲野豬唔好亂咁過馬路？」謝展寰無直接回應，只係話十分重視野豬問題，政府捉野豬避孕同絕育，就係想探討有效控制野豬數目嘅方法，又話市民唔餵野豬，佢哋就唔會走出市區，呼籲公眾停止餵飼。
|
| |
| |
;)
