【明報專訊】法律同生活息息相關，但啲條文係咪好似外星文呢？唔緊要，香港大學法律及資訊科技研究中心今日推出家庭社區法網(http://www.familyclic.hk)，用淺白方法向大眾講解法律基本資訊，除咗有青少年常犯罪行、離婚、私隱條例呢啲「大路」法例之外，連聘用童星受咩法例監管、喺門口燒衣係咪犯法都講埋。 專業人士撰寫 19家庭法律議題 呢個網站由多個法律界專業人士撰寫，講解咗19個與家庭生活息息相關嘅法律議題，包括家庭暴力、領養兒童、同居等。Emily從中發現唔少有趣法律知識，例如未夠13歲一般唔可以打工，但藝員就可以豁免，但上堂時間唔可以拍戲、收工時遲過夜晚7點，僱主就要免費接載佢哋返屋企。 個網入面仲有同鄰舍糾紛有關嘅法例問題，例如引述咗舊案例，話喺大廈走廊等公用地方點香、燒衣，以致煙霧同氣味滋擾鄰居，係可以構成滋擾行為、被起訴㗎。 小冊子免費索取 呢個網有咁多內容，Emily真係講唔晒，但港大已經將網站內容撮錄成有100條題目嘅「家庭法網百問百答」小冊子，市民只要郵寄去港大百周年校園鄭裕彤教學大樓法律及資訊科技研究中心(毋須附上回郵信封)，或電郵去book@familyclic.hk就可以免費索取小冊子㗎嘞。
|
| |
| |
