【明報專訊】噚日立法會特別財委會傾新一年發展局財政預算，人民力量「大嚿」陳偉業想問地政總署工作，又講明唔使局長陳茂波答，但「波叔」一於少理回答，搞到大嚿發脾氣鬧佢「劏房波」、「囤地波」，叫佢「唔好阻住署長答」，最終被主席吳亮星趕出場。 大嚿罵陳茂波「劏房波」 大嚿噚日想幫一班同政府有土地糾紛嘅人出頭，問地政總署會唔會改用調解方式處理糾紛，避免同小市民打官司，減低市民賠律師費嘅可能，又講明唔想聽陳茂波講嘢，因為佢「講大話無人信」。波叔聽到後即刻話要澄清，大嚿即刻指住鬧佢，又話「呢度係我主場，我唔要聽你答」。陳茂波就要求主席叫大嚿道歉，大嚿唔肯，仲繼續鬧佢，吳亮星就要求大嚿離場。 吳亮星上晝趕人走，下晝同商務及經濟發展局長蘇錦樑開會，新民主同盟范國威追問蘇錦樑話有「定期」同內地旅遊局商討，究竟係幾耐傾一次、點傾法呢，但局長同旅遊事務專員容偉雄答極都答唔出，搞到班議員好嬲。 大嚿都頂唔順出聲，鬧蘇錦樑「派卡片就叻」，吳亮星今次唔單止無再趕佢離場，仲叫停蘇錦樑，批評蘇「鑽極都鑽唔出」，勸同事都唔需要嘥時間追問。
|
| |
| |
