【明報專訊】特首梁振英(CY)放棄連任呢個重磅消息，令政界震驚，而過去一直主打「ABC(Anyone but CY)」嘅自由黨理應熱烈地彈琴熱烈地唱。不過，早排黨主席張宇人(Tommy)破天荒喺政府剩番7個月任期嘅時候加入行會，令人跌晒眼鏡，唔知今次會唔會令佢變為最短命嘅行會成員？至於一向堅持ABC嘅田北俊，就話好歡迎中央聽取民意叫梁振英不連任，話係值得高興嘅事。 Tommy噚日喺立法會回應，話事前完全無聽到消息，覺得好驚訝。對於係咪覺得自己押錯注、後悔加入行會？佢聽到就大笑三聲﹕「佢(CY)由頭到尾無講要我支持，睇唔到注押喺邊度。」但係田少早排就預言，如果到時特首換人，或者會令Tommy無運行。佢就重申，唔覺今次係押注嘅問題，但就自嘲咁話﹕「押注嚟講，我押錯唔會係第一次，亦唔會係最後一次。」 至於之後會唔會考慮改為支持財爺曾俊華？Tommy都係強調，要睇政綱，如果呢位「哥哥」政綱講標準工時，都無可能會支持佢。 其實大家噚日都好奇已經表態積極考慮選特首嘅曾俊華，對呢個重磅消息有咩回應，噚日咁啱約咗傾財政預算案嘅資訊科技界莫乃光就話，下晝見到財爺，見佢「表情鎮定」，完全睇唔出有咩「天機」。據Emily所知，財爺噚日都有同朋友聯絡，據知財爺對CY唔玩都表現愕然。
|
| |
| |
;){kind=small}
;)
