英格蘭U21周五在U21歐國盃附加賽的首回合，憑比拉希奴完場前5分鐘射入12碼，主場以2﹕1反勝克羅地亞U21，但因對方取得1個作客入球，仍未能鎖定出線機會。

英格蘭U21今仗以近期在西布朗大放異采的比拉希奴，與熱刺新晉中鋒哈利簡尼組成鋒線，而「降呢」回到U21的曼聯左閘勞基梳爾，亦正選披甲；至於熱刺右閘艾歷迪亞及侯城中場湯馬士恩斯，則先列後備。

幼獅軍團雖然主場出擊，但開賽13分鐘先失守，被克軍一次角球攻勢，由前鋒利華查接應隊友頭槌二傳，近門頂入。

落後的英軍積極反撲，但有勞基梳爾21分鐘在近左路底線位置，勁射中遠柱彈出，而效力諾域治的列特文其後在30碼放冷箭，亦被對方龍門撲出底線，結果落後1球返更衣室。

換邊後，英格蘭繼續主攻，並在戰至58分鐘，由上半場多次浪費機會的哈利簡尼，接應比拉希奴左路傳中頂入，追成1﹕1；其後，戰況膠著，直至完場前5分鐘，比拉希奴禁區內博得對方門將犯規，親自操刀射入12碼，助球隊以2﹕1反勝，挾1球優勢，下周二移師克羅地亞主場踢次回合，再決生死。