想建狗廁所 盼局長幫口 田北辰讚到高永文上天

想建狗廁所盼局長幫口田北辰讚到高永文上天

[2016.06.06] 發表

【明報專訊】政黨嘅辦事處開幕，不時都會請官員做嘉賓，噚日新民黨立法會議員田北辰，以及該黨荃灣區議員鄭捷彬喺深井嘅辦事處開幕，邀請咗食物及衛生局長高永文出席，田二少仲對高永文讚不絕口，話以民望選特首，高局長一定跑贏一條街；如果選最靚仔局長，佢都一定係頭三甲。民望高呢個名並非浪得虛名嘅，噚日高永文離開時，鄭捷彬媽媽就同高醫生講話係佢粉絲，仲有一齊合照。

話曾俊華袁國強靚仔

田二少話，除咗高醫生，班子中另外打入靚仔官員嘅，仲包括財政司長曾俊華、律政司長袁國強喎。

田二少仲話，原來咩都關食物及衛生局事，由醫院、狗狗大小便、蠓患，以及早前群育學校嘅議題，都係由高永文答，仲答得快過教育局。讚咁多，田二少都想向高永文落吓單，佢話深井最頭痛嘅係狗嘅大小便問題，食環署好幫手，打算興建狗廁所，但遭到地區團體反對，田二少希望希望高永文可以說服吓地區團體，而高永文亦無托手踭，應承會幫手。

至於新界西嘅議題方面，田二少亦反映屯門醫院資源不足，唔夠醫生、護士同病牀數目，高永文立即話已經叫咗醫管局檢討喎。