「好天曬落雨淋」 葉劉入院了 再缺席選舉論壇

[2016.08.23] 發表

【明報專訊】新民黨葉劉淑儀真的病倒了，仲公布要入院休息。葉太噚日喺facebook話，自己病咗近3星期，食過抗生素同類固醇，但病况一直未有好轉，持續發燒。葉太聽醫生建議，噚日入院休息。

持續發燒咳到面色變

據Emily所知，葉太噚日朝早咳到面色都變埋，身邊友好隨即勸佢去睇醫生，葉太亦喺下午入院。其選舉部署亦因此被打亂，本來葉太已準備出席噚晚有線電視舉行嘅選舉論壇，最後都要由拍檔陳家珮同王政芝等出席。葉太身邊人話，葉太未來仲去唔去到其他選舉論壇，要視乎佢幾時出得院。

葉太喺facebook話，聽到醫生建議要入院休息時「有點激動」，因為擔心餘下嘅選舉工作。佢又話，個女和同事都話佢太過操勞，「晨早到夜晚，好天曬落雨淋，又冷又熱，一星期工作足足七天」，因此大家紛紛叫佢多休息。葉太又話，好彩團隊為佢分擔繁重嘅選舉工作，希望休息過後，可以盡快返回崗位，預備選舉。

早前被對手質疑詐病

葉太早排無出席港台論壇，只派選舉拍檔出席，並指自己有病，但同日下午就去咗石澳拉票兼有街坊請佢食多士，結果選舉對手乘機質疑佢係咪有病。

香港島其他候選人包括﹕黃梓謙、劉嘉鴻、何秀蘭、張國鈞、詹培忠、鄭錦滿、羅冠聰、沈志超、王維基、徐子見、司馬文、許智峯、陳淑莊、郭偉強。

更多港聞