《兄弟幫》2000集成長壽節目 元老Bob唔怕被摑最驚嘉賓懶巴閉
【明報專訊】無綫J2節目《Big Boys Club》(兄弟幫)於2010年首播，轉眼第7個年頭，昨晚迎來播出2000集，成為長壽節目之一。當初監製謝英偉接到指令只是嘗試做60集，他與第一代元老林盛斌(Bob)都估不到會長做長有，跟不同時期的兄弟，跨過各種難關，創造一個紀錄。未來繼續穩步前行，朝向3000集邁進。
陳偉霆歐陽靖做開荒牛
J2於2008年開台，以播映外購節目為主。其後無綫管理層希望有自製節目，在《兄弟幫》之前有另一個清談節目，而謝英偉接到高層指示構思另一個模式，他就物色新鮮活潑面孔，第一代主持陳偉霆、MC Jin(歐陽靖)、林盛斌(Bob)相繼出現，各有獨特風格。謝英偉笑說﹕「當時3個都不是TVB人，亦不知節目出來會點，他們都不介意被我呃，一齊開發新時段。初時先拍60集，慢慢摸索，逐漸題材多元化，吸引到年輕觀眾。」
監製﹕原本拍60集
第一代元老Bob一直堅守陣地做到現在，他回想2009年底自己做了幾年電台，都想試做電視台，遇到《兄弟幫》這個節目，初時預計做2、3個月，點知100集、200集、1000集，現在更做到2000集。其間陳偉霆、MC Jin有其他發展離開，亦有新的兄弟加入，如關智斌、張致恆等，現在基本班底有他與梁烈唯、陳國峰、王梓軒、范振鋒，建立良好關係、好合拍。由DJ轉做電視節目主持，Bob說﹕「好多事要適應，如電台不用化妝、說話好急促，都要調教。當時有些網民對我有好多批評，逐漸都接納我的風格。」
要觀眾覺得有趣
王梓軒由做嘉賓變主持，他說﹕「同Bob傾得好開心，就試吓做主持，學習當中的技巧，之後轉簽藝員約，還拍劇集。」Bob指王梓軒好大變化，以前斯文乖仔，現在談話內容放膽好多，帶動嘉賓發揮。他續說﹕「做這類talk show似成班人吹水，亦要站在觀眾角度想，他們想知什麼？如訪問少年股神，觀眾想知他一日最叻賺幾多錢？要觀眾覺得有趣。」
陳國峰覺得《兄弟幫》造就另一個自己﹕「監製之前看中我在旅遊節目調皮一面，但入了《兄弟幫》令他有少少跌眼鏡，因鏡頭後的我會好生鬼、玩得好癲，但不擅長在鏡頭前講話。沒有《兄弟幫》，我可能沒有咁多曝光率，亦無機會打開心扉，鍛煉主持技巧。」Bob說﹕「國峰其中一個最大障礙是覺得同嘉賓唔熟，但好多嘉賓都是第一次見，可以用身體語言拉近距離，像成班人圍埋傾偈。嘉賓都會被氣氛感染，放開融入話題。」
兄弟沒有隔夜仇
現在5人組合維持4年是最耐，但他們現在都是大忙人，謝英偉笑言﹕「最近出現5個主持要度兩個都度不到，要搵吳業坤幫手做客席主持，坤哥同主持熟又玩得。」會否太熟玩出火？王梓軒說他們沒有隔夜仇，不會記得。有否遇過好難對付的嘉賓？王梓軒即時指着Bob，隨即想到Bob被林敏驄掌摑事件。Bob解釋道﹕「可能大家覺得嗰次林敏驄惡搞我，其實大家又唔知我同佢識咗好耐，大家為節目效果，佢睇完都打來話正，話好過癮。」他們覺得最難搞的嘉賓是以為自己好巴閉，問10個字答2個字，這個時候他們就自己吹水。《兄弟幫》的廠景設計像屋企張梳化，讓大家開懷傾談。
囡囡許配王梓軒
節目中，兄弟們會互相補位或解圍，又會玩整蠱，如問王梓軒同邊個拍拖？王梓軒笑指被兄弟質疑他的性取向，說未見過他帶女友出來，他說﹕「我有拍過拖，的確現在是無嘅！」Bob叫他公開擇偶條件？王梓軒說﹕「聰明、獨立，有幽默感。做咗《兄弟幫》後愈來愈忙，都識不到女仔。」Bob大讚王梓軒是白馬王子﹕「無得頂，你等我個女19歲(現在9歲)就可以許配畀你，嗌聲外父先。」
問到是否想挑戰《歡樂今宵》最長壽節目地位？他們說不敢，未來是否能達到3000集亦是未知之數！但有得做都會繼續做落去。
記者：葉靜文
攝影：黃梓烜
