【明報專訊】立法會補選3月11日舉行，如果仲未係選民嘅你，即使現時做登記都趕唔切投票喇，不過政府噚日展開新一輪選民登記運動，如果未做選民又或住址等資料有變更嘅，都應該盡公民責任，喺法定期限之前通知選舉事務處。 除咗3．11補選4個議席，立法會仲有兩個分別屬於新界東同九龍西嘅議席空缺，暫時未知幾時補選，如果市民喺今次選民登記運動中做登記或更新資料，都會反映喺7月發表嘅正式選民登記冊中。 選舉事務處發言人話，選民如果要更改住址登記，就要喺4月2日或之前通知選舉處，而於2月1 日之後更改，就要同時提交住址證明，以便選舉處核對資料，從而提高選民登記冊嘅準確度；但如果選民係房署、房協轄下嘅公屋登記住客，申請改地址時可豁免。 持有身分證明文件、年滿18歲嘅香港居民，都可以登記成為選民，新登記申請將於5月2日截止，市民可以去選舉事務處、各區民政事務處或公屋辦事處拎選民登記表，亦可以喺選民登記網站下載，可以選擇以郵寄、傳真或電郵方法交畀選舉事務處。
|
| |
| |
