【明報專訊】政府早前公布授勳名單同太平紳士委任名單，4名現任建制派立法會議員榜上有名，立法會好快手更新咗議員資料。立法會24名民主派議員當中，得3個泛民曾獲勳銜或者係太平紳士；建制派情况就相反，42個議員當中只有5個係無勳銜。 民建聯議員蔣麗芸同陳恒鑌，喺今年分別獲得銀紫荊星章及銅紫荊星章；金融界議員陳振英同工聯會陸頌雄都獲委任為太平紳士。 目前立法會有68名議員，包括24名民主派、42名建制派、被視為中間派嘅醫學界陳沛然，以及鄭松泰。根據立法會最新嘅議員資料，民主派議員當中，衛生服務界李國麟最勁，已經擁有銀紫荊星章，亦係太平紳士。民主黨胡志偉就有榮譽勳章，資訊科技界莫乃光就係太平紳士。其餘泛民議員、陳沛然及鄭松泰，一律未有任何勳銜。 建制派方面，自由黨鍾國斌同邵家輝、工聯會何啟明、民建聯周浩鼎，以及新民黨容海恩，亦暫時未有勳銜。
|
| |
| |
