家臻爭取芭蕉扇 健民練跑全馬

家臻爭取芭蕉扇健民練跑全馬

[2019.05.28] 發表

【明報專訊】佔中9人案嘅佔中發起人陳健民及戴耀廷、社福界議員邵家臻等正在服刑，近日天氣較熱，阿臻透過議員助理向Emily提到，佢身處嘅赤柱監獄，一層有84個倉，每個倉住1至2人，合共只得12部風扇，據了解囚室亦未必有窗，可想而知裏面有幾熱。阿臻本身患有濕疹，咁嘅天氣下，家人去探望時亦見到佢皮膚泛紅。

阿臻希望懲教署可以加設風扇，以及容許家人拎「芭蕉扇」(手提電風扇)畀囚友，或者畀囚友掙錢購買。佢舉例，過往獄中亦冇得買蚊貼，都係社區組織協會爭取下，先爭取到喺獄中小賣部有售。

被判入獄16個月、喺壁屋監獄服刑嘅陳健民(KM)，噚日亦有獄中來鴻。佢以英文描述獄中生活，透露自己做木工，每日中午、晚上嘅休息時間都用嚟讀書，入獄唔夠一個月已經睇咗9本書。

KM話，終於掙夠薪水買「跑鞋」，每周會跑步4次、每次40分鐘。佢希望出獄後可以跑全馬，仲話目標係跑明年柏林馬拉松，「跑過布蘭登堡門，對於每個爭取自由的人而言，應是非常有意義的事」。