【Emily】維港水上的士招標 講明要有「睇夜景」航班
[2019.12.14] 發表
【明報專訊】早前紅隧癱瘓，渡輪成為部分人過海嘅選擇，運輸署噚日開始就「中環-紅磡」及維港「水上的士」兩條渡輪航線招標，如果成功招標，日後市民過海就多個選擇喇。
日逾3班 一班須7點後
其中水上的士係新航線，有5個上落點，包括啟德跑道公園、紅磡、尖東、中環、西九文化區，搭客可以喺任何一個站點自由上落。
為咗增加水上的士航班靈活性，營辦商可建議營運時間，但每日最少提供3班渡輪服務，當中一班次必須喺夜晚7點或以後喺啟德開出，等搭客可以享受維港夜景。政府亦要求營辦商提供手機App，發放渡輪航線實時到達資訊，以及喺碼頭同渡輪上提供免費Wi-Fi。另外，營辦商亦可以建議營運其他短途服務，來往維港兩岸碼頭，滿足個別地區乘客嘅出行需要。
中環紅磡線再招標
至於來往紅磡至中環嘅航線，以前都曾經營運過，後來因為客量不足，營辦商放棄續牌，政府重新招標但流標，航線喺2011年停航。
今次復辦航線，最終有冇人投標呢，就要拭目以待喇。
更多港聞
相關新聞
