【明報專訊】建制派近月積極喺網上世界發聲，民建聯漁農界立法會議員何俊賢亦加入嘗試做YouTuber，前日深夜喺facebook叫網友畀啲意見佢，佢個YouTube頻道改咩名。佢拋磚引玉，例如係玩用佢個名「食」字嘅「腎賢」、「賢言亦色」。有網民建議佢改做「賢．論自由」、「友心直賢」、「賢之進諫」等。何俊賢對呢啲建議亦一一回應，第一個就話風格與別不同，第二個似下午茶婦女節目，第三個就似黨友鄭泳舜嘅頻道名。佢暫時用番「何俊賢」做頻道嘅名。 網民提議「賢．論自由」被拒 何俊賢噚日凌晨開直播講熱爆嘅話題「打劫廁紙」，佢著住波衫，戴住個耳筒，似足球賽旁述員，有網民留言話佢似等睇4點場波。佢又話，唔係好習慣用電腦做直播，搞到少望鏡頭，又請教網民人哋有字框又可以插圖咁係點做㗎。
|
| |
| |
