【明報專訊】新型冠狀病毒肺炎疫情持續，近排唔少人喺網上評論政府抗疫表現。科技公司慧科就結合大數據運算模型，同埋人工智能文本分析技術，分析1月1日至2月14日超過28萬篇疫情相關帖文、逾1092萬則網民留言，同埋近34億次網民互動，了解網上輿情。 最關注嘅人係林鄭月娥 慧科發現，過去個半月除咗「武漢肺炎」，網民最多提及嘅熱詞係「口罩」，喺帖文出現次數超過12萬，網民主要討論點用同搶購口罩。慧科認為呢個反映民情聚焦政府應對抗疫物資嘅能力，多過擔心疫情惡化。 至於網民最關注嘅人，係領導抗疫嘅特首林鄭月娥，喺數據期內林太被提及近1.5萬次，第二位係港大微生物學系講座教授袁國勇，佢被提及嘅次數比林太少超過一半，有約7100次。 慧科又發現，喺疫情相關嘅議題，網民嘅不滿同憤怒主要嚟自口罩短缺同林太要求官員除口罩嘅言論。
|
| |
| |
