【Emily】葉劉：我為容海恩做好多嘢

[2020.03.20] 發表

【明報專訊】新民黨容海恩(Eunice)退出黨內嘅新界東初選，認為機制係為某人度身訂做、結果內定。佢老公袁彌昌向傳媒批評，新民黨主席葉劉淑儀「無保住自己啲下屬」。正喺屋企自我隔離檢疫嘅葉太噚日喺電話同Emily講，「唔可以話我唔攬佢(Eunice)，𠵱家又唔係政府機構」；強調過去為Eunice做咗好多嘢，但選舉應該汰弱留強。

強調選舉汰弱留強

話容約傳媒講退選唔成熟

葉太之前話會搵Eunice傾吓，但兩人呢幾日無機會面對面傾偈，葉太話佢發咗短訊畀Eunice，問佢點解有怨言唔早啲同佢哋講，反而先約一班傳媒公布退選，批評咁係不負責任、唔成熟。

容：同葉太關係仲好好

Eunice話未覆葉太，又話唔係對新民黨廣納賢才有怨言，而係近日發生咗啲事，令佢覺得初選機制奇怪。佢強調一定睇新民黨嘅大局，叫大家唔使緊張，同葉太關係仲好好，又話當知道葉太曾去內地，都有叫佢小心。

退出自由黨參加新民黨新東初選嘅李梓敬噚日話，佢已收齊提名，可以入到閘。