【Emily】關閉26年 將軍澳堆填區活化「環保村」
[2021.06.03] 發表
【明報專訊】關閉咗26年嘅將軍澳堆填區第一期，終於有發展項目可以落實。噚日立法會工務小組討論活化已修復堆填區資助計劃，政府批准東華三院將呢個堆填區其中一幅佔地約2公頃嘅土地，活化為營地同環保教育基地(又稱「環保村」)，涉及款項9260萬元，政府話若立法會批准撥款，就會展開工程，目標約1年半內完工。
堆填區關閉後仍要維修同保養，有議員關注安全問題，例如堆填區會排放有害氣體，又會出現不平均沉降，關注東華三院係咪有能力應付。民建聯議員周浩鼎則關注財政問題，根據政府提交文件，環保村於首兩年獲批基本投資，之後要自負盈虧，擔心入場費會太高；佢又提到環保村首3年估計會有約22萬人次使用，擔心蝕錢嘅話，政府係咪要公帑填氹。
環署：沉降減慢 會監察氣體污水
助理環保署長陳兆榮話，該堆填區已關閉26年，沉降速度已減慢，堆填區維修亦會由環保署負責，包括監察氣體同污水排放等。東華三院行政總監蘇祐安話，東華三院𠵱家喺馬草壟營運嘅營地做到自負盈虧，入場費亦會喺市民負擔範圍之內，着議員放心。工務小組噚日通過有關項目，稍後會交上財委會。
更多港聞
小一放榜 預視生源續跌 教界籲齊減叩門額避縮班
【明報專訊】新學年小一統一派位結果昨日放榜，因應疫情而連續兩年以郵遞通知家長。有家長昨早甫收到結果就到小學叩門（申請候補位）。有家長為獲派第... 詳情
相關新聞
