10．8第二次「連環四月食」

[2014.09.25] 發表

【明報專訊】本港下月8日將出現月全食，今次月全食特別之處係開始時喺地平線以下，故入黑後只要抬頭，就可以見到「帶食而出」嘅月亮。當日整個月蝕過程為3小時36分，月出時間為下午5時59分，從月亮部分被遮蔽嘅「食既」，以至月亮重新露出嘅「生光」過程約1小時，其間月亮完全被遮蔽嘅「食甚」，會發生於晚上6時55分，月亮會呈現暗紅色，原因係太陽光嘅藍色波段會被大氣層散射掉，剩下紅光會被折射到月球上。

今次月全食另一特別之處，係今年自4月15日開始「連環四月食」嘅第二次，所謂「連環四月食」，即係連續4次發生、每次相隔6個月嘅月全食，餘下兩次將於2015年4月4日及9月28日出現，前者可以喺香港見到。香港天文學會話「連環四月食」唔算罕有，1900年至2100年間出現過13次，但放喺宗教就有特別意義，因為過去500年，只有3次「連環四月食」喺猶太人嘅「逾越節」同「住棚節」之間發生，今次係第四次，錯過咗就要等到2032年。

石澳萬宜東壩可觀賞

天文台話，月全食當晚如天色良好，市民面向東方地平線嘅地方，如石澳、萬宜水庫東壩、大帽山山頂等可以觀賞到。太空館會喺當晚6點半開始，喺尖沙嘴星光大道中段舉辦「月全食之夜」免費活動，由職員指導市民用天文望遠鏡觀賞月全食。