費格遜暗潤雲格收工
賀「廠」脫9年無冠 踩執教難超26年
曼聯前領隊費格遜去年退休後望落溫柔客氣不少，最近更在其改版自傳《My Autobiography》中轉晒口風，大讚死敵利物浦是「去季最佳」，並為阿仙奴主帥雲格結束9年無冠高興，卻又指對方沒可能像他般執教曼聯26年，似明讚實際暗潤「教授」遲早收工，所以，誰說費Sir個風筒已經收埋咗？
費格遜的自傳於去年10月出版，第一版內容解密碧咸離開曼聯、指愛將基斯坦奴朗拿度是「上天給我的禮物」等。近日自傳改版，費Sir一反常態稱讚死敵利物浦「神奇、頂級、超卓」，在領隊羅渣士帶領下是「去季最佳球隊」，仲話對方踢得咁好，係仇人嘅佢都嬲唔落。
讚利物浦「去季最佳」
明讚死敵都未夠，費格遜仲恭喜阿仙奴去季奪得足總盃(雖然講到明布魯士係自己高徒，想侯城贏多啲)，令宿敵主帥雲格終於釋放9年無冠壓力，但仇人突然變朋友，確令人難以置信，只能懷疑解作費Sir其實在暗「潤」對方。這名蘇格蘭籍名帥果然對雲格不盡是稱讚，表示唔睇好已執教阿仙奴18年的雲格，可以打破自己教曼聯26年的紀錄，暗咒對方被炒或提早退休：「你唔會見到有人執教一支球隊超過26年了，但雲格如果退下來，都好值得被表揚嘉許。」
批莫耶斯教到曼聯慢晒
費Sir個風筒亦指向他的曼聯繼任人莫耶斯，在改版自傳中向這個蘇格蘭同胞開炮。去季莫耶斯因成績差劣，執教曼聯10個月後即被炒魷，球迷連盛傳是「欽點者」的費格遜都唔放過鬧埋，但他在新版自傳為自己抱不平，指對方由愛華頓加盟曼聯係跨了一大步，可惜他「並不清楚曼聯是多大的一間球會」，又指在莫耶斯初來報到的時候，已勸對方留住助教費蘭，可惜對方不聽老人言，盡帶入自己的教練團，加上改變球隊風格，成隊波節奏踢到播慢鏡咁，最終才「食無情雞」。所以，費Sir講一輪的目的是紅魔去季的不濟與自己留下「殘陣」無關，似跟莫耶斯劃清界線。費Sir又透露莫耶斯被炒的消息是在返曼市的飛機上偷睇鄰坐報紙才知道，而對方傳短訊畀自己時，他實在唔識反應咁話。
