4頁數據力撐自己 尹帥小器失民心

4頁數據力撐自己尹帥小器失民心

[2015.02.12] 發表

尹戈爾縱橫球壇40年，獎盃擺滿成個櫃，帶領的曼聯被人稱為「長傳聯」，自然火都嚟埋，於是在記招拎出4大頁數據反擊，句句「串嘴」。不過並唔係個個受落，名宿史高斯鬧佢小器，球評話佢「面皮薄」，最慘嘅係連自己人都唔畀面，「紅魔」公關在佢隔籬「藐」爆他。結果尹帥平反不成，霸氣盡失。

賓尼迪斯做利物浦主帥時，曾經在記招拎出一張紙，細數前曼聯領隊費格遜鬧球證的歷史，而摩連奴任教皇家馬德里時，亦以圖表證明自己歐戰歷史比以往主帥都風光。今次尹戈爾仲厲害，拎夠4頁！「我哋係轉邊，唔係亂斬」，又話「都唔係咁難明啫」，仲下戰書挑戰話佢「長傳聯」的韋斯咸領隊艾蘭戴斯﹕「你哋(記者)拎畀佢睇，叫佢解讀一下。」

紅魔公關當眾藐爆

尹戈爾可能自我感覺良好，但現場記者眉精眼企，發現曼聯公關Karen Shotbolt笑臉迎人幫尹帥「派notes」後，竟然背對老闆做出藐視表情。Karen姐妳要小心喇，因為紅魔名宿史高斯就話尹帥好小器，有失曼聯領隊風範﹕「你使乜理佢？當然如果是車路士或者曼城等死敵領隊又唔同，但講到底你是曼聯領隊。老實講，我覺得你激到傻咗，艾蘭戴斯只想講吓笑。」至於《郵報》的球評家Ian Ladyman就認為尹帥似「要維護在阿積士、巴塞隆拿及拜仁慕尼黑建立的名聲」。

史高斯：尹戈爾激到傻咗

其實尹戈爾在英國球壇樹敵愈來愈多，佢日前再次拒為鬧球證認罪，勢被足總處分，而史高斯就提佢最緊要唔好得罪米飯班主球迷喇﹕「(朗尼打中場)咁樣唔好睇，我聽到尹戈爾最近話曼聯不能冒險，但你叫球員遠離進攻區域，咪又係冒險。曼迷鍾意睇高壓足球㗎！」

更多體育二