紅館添馬都無 助長用膠樽 郭家麒促港鐵增飲水機

紅館添馬都無助長用膠樽郭家麒促港鐵增飲水機

[2016.01.07] 發表

【明報專訊】政府喺公眾場所設置飲水機，鼓勵市民減少買樽裝水，但效果欠佳，公民黨立法會議員郭家麒噚日喺立法會提出口頭質詢，話堆填區每日接收200公噸膠樽，數量高達600萬個，但政府嘅大型設施如紅磡體育館、濕地公園，甚至添馬公園都搵唔到飲水機，批評政府動用數以百億元興建焚化爐及擴建堆填區，推動市民減廢完全唔及格，要求政府同港鐵商討，喺沿線港鐵站加設飲水機，佢話台北約九成地鐵站都有飲水機。

發展局長陳茂波話，政府喺公眾地方設置飲水機，主要喺康文署轄下設施，例如運動場或泳池等，而全港政府設施共設有1377部飲水機，當中約九成係噴射式，餘下大部分係桶裝水；公營機構如機管局及醫管局，轄下場地安裝咗323個飲水機。有議員話本港食水達到世衛標準，點解唔可以喺公共地方增加自來水直接飲用點，較桶裝水更環保。

茂波話鋪設喉管涉及建築工程，喺靜態場地如圖書館未必適合，另外佢又引述港鐵公司，指考慮車站人流及衛生等因素後，目前未有計劃於車站內設置飲水設施，如果有乘客因身體不適而需要飲水，港鐵職員會提供。