【明報專訊】前財政司長、「薯片叔叔共創社」創辦人曾俊華(John)，早排接受團結香港基金《政策?正察》facebook專頁訪問，講吓教育理念同未來教育發展前景，佢提到人工智能將會取代大量工種，新一代要集中學軟知識；又話自己係放任型家長，由下一代向前跌都冇有怕。 John喺訪問中話，科技進步，機器可以取代好多人手工作，所以大家應該要重新思考教育上死記硬背嘅意義；而好多家長都想小朋友讀書後做「三師」，即係律師、醫師、會計師，但其實好多相關工作會被人工智能取代，所以小朋友應該要加強軟知識訓練，例如點同人溝通、有同理心等等！ 身為人父嘅John形容自己係放任型家長，由仔女自由發展興趣，好似阿仔讀酒店學校、阿女讀經濟同日文，無一樣興趣同佢相同，佢相信鼓勵而非責罵先係育兒之道。John亦唔怕小朋友跌倒，但最重要每次都係向前跌，因為起身時已經係向前行一步，咁佢哋創新之路就可以愈行愈遠。 4輯專訪內容今日陸續上載至《政策?正察》facebook專頁，想睇嘅朋友留意喇。
|
| |
| |
