【明報專訊】香港回歸21周年在即，立法會議員已經陸續收到七一酒會嘅邀請，當中喺3．11補選勝出嘅新任立法會議員區諾軒同范國威都收到邀請函，但兩人都話唔會出席酒會。 身兼民陣副召集人嘅區諾軒近日同警方就七一遊行起步點仍未有共識，佢好不滿點解警方唔畀市民喺銅鑼灣東角道起行，佢同Emily講，「你(政府)連七一都唔畀條路市民遊行，我做唔出無事發生咁去酒會」；范國威就話，「主權移交係管治上嘅倒退」，應該唔會出席酒會。 公民黨黨魁楊岳橋話未知收到邀請未，「到時再決定」；民主黨尹兆堅亦話未知收唔收到，指黨團至今未有討論酒會嘅事。專業議政邵家臻就話無印象收過邀請。 民主派一向都唔太熱中出席呢種禮節式酒會，不過，特首林鄭月娥過去一年都應邀去過唔少民主派政團嘅黨慶或者會慶酒會，相信泛民都會「禮尚往來」，派代表出席今年嘅七一酒會。
|
| |
| |
;)
