【明報專訊】Emily跟唔少港人一樣都鍾意飲吓咖啡，但講到要去廉署飲咖啡，大家就走夾唔唞；今年適逢廉署45周年，以「誠果」作為活動主題信息，佢哋會喺未來兩個月去鬧市地點請巿民「飲咖啡」，希望奉公守法者有機會試吓廉署咖啡，同感受一下反貪「誠果」。 廉署先喺本月中(1月18至20日)於尖沙嘴海港城設「快閃咖啡分享」大型攤檔，請市民飲咖啡，再下一個星期(25至27日)就喺銅鑼灣時代廣場搞。除咗飲咖啡，市民於攤位活動玩遊戲更有機會攞到有廉署標誌字眼嘅DIY布袋、行李牌同多功能旅行儲物袋等。如果咁啱跟廉署同年(1974年出生)或同日(2月15日出生)誕生嘅市民，仲可以換限量版紀念品𠻹。 廉署今次都好貼心，喺呢個人人要打卡報到嘅年代，仲整埋個大型咖啡杯擺設(見圖)畀巿民坐上去，配合埋文青主題冰室背景影相咁話。去到廉署生日嗰日(2月15日)，一架印有廉署45年周年宣傳標語嘅電車會穿梭港島市區，「突襲」數個指定電車站，向市民派發「廉署咖啡」及紀念品。
|
| |
| |
;){kind=small}
;)
