馬逢國：顧嘉煇離開咗我哋 煇哥﹕仍健在 歡迎嚟睇騷

馬逢國：顧嘉煇離開咗我哋煇哥﹕仍健在歡迎嚟睇騷

[2016.02.05] 發表

【明報專訊】噚日立法會繼續審議被網民稱為「網絡23條」嘅版權修訂條例草案，會議廳內唇槍舌劍，不過，「體育、演藝、文化及出版界」議員馬逢國可能怕大家太悶，所以爆笑料。佢作為演藝界代表，發言時支持條例，以香港作曲家及作詞家協會(CASH)做例，話CASH有4000幾個會員，唔係大財團，出名嘅會員有「已經離開咗我哋嘅顧嘉煇、黃霑作曲作詞人」，亦有寂寂無聞嘅年輕創作人。

曾鈺成叫澄清意思

吓！但煇哥(顧嘉煇)仍然健在喎，嚟緊月底仲會搞慈善音樂會𠻹。人民力量陳志全喺會議上聞言，即刻起身話「阿煇哥呢，佢2月尾會喺紅館開演唱會」，連主席曾鈺成都叫馬逢國澄清「離開咗我哋」係咩意思。馬逢國之後改口，話自己講嘅係離開咗我哋嘅黃霑，同埋好出名嘅顧嘉煇喎。

對於自己「被離開咗」，煇哥就幽默回應，話自己正忙於籌備音樂會，可能馬逢國亦都貴人事忙，煇哥話自己現時仍健在喺香港，非常歡迎對方嚟睇音樂會，一齊共襄善舉。至於幫煇哥搞音樂會嘅負責人丘亞葵認為馬議員可能貴人事忙，一時誤會，所以想請馬議員去睇煇哥嘅音樂會喎。

藝人何韻詩就乘機抽一下水，喺facebook話，「文化界，喎。不過其實佢當人死嘅都唔算新聞，佢本身都當所有文化人係死㗎啦」。

更多港聞