漁護署放生3隻綠海龜
[2016.08.13] 發表
【明報專訊】漁農自然護理署噚日喺香港東南面水域放生3隻幼年綠海龜，等佢哋回歸自然。呢3隻海龜係前年1月到今年7月之間，喺海灘同垃圾站畀市民發現。漁護署人員檢查之後，海龜就送咗去海洋公園，由獸醫評估同治理，綠海龜之後就一直喺海洋公園暫住，接受持續觀察。
漁護署話3隻龜健康良好，適合返大海生活。放生前，漁護署幫海龜植入晶片同扣上金屬標誌，同時喺背甲裝咗衛星追蹤儀，追蹤佢哋嘅動向同覓食地位置，以蒐集數據，制訂保育措施，又會將呢啲資料分享畀各地嘅保育機構。
漁護署話，綠海龜屬於全球瀕危嘅物種，如果「野生捕獲」到佢哋嘅蹤影，可以打1823熱線向漁護署報告。
更多港聞
相關新聞
