侯志強斬柴喻提名 「分開綑綁都係綑」
[2017.02.03] 發表
【明報專訊】鄉議局主席劉業強曾經講過鄉議局27票會綑綁提名同投票，仲話傾向支持林鄭月娥。但係同樣係鄉議局選委嘅侯志強噚日就話，會跟隨鄉議局決定綑綁式投票，但認為綑綁都有好多種可以諗，「好似上山斬柴攞一束落嚟好辛苦，若分成兩堆擔落嚟會無咁辛苦」，「綑一紮、兩紮、三紮都係綑」。
侯志強接受港台《千禧年代》訪問被問到，係咪即使有心儀嘅參選人亦都會跟鄉議局投票，佢回應話「勉強沒幸福」，又話「得民意者得天下」，強調民意支持好重要。侯志強認為自己僅一票，微不足道，但會先參考參選人嘅政綱後再決定。
侯志強又點評4個特首參選人，形容林鄭月娥聰明、有行政經驗、對事情睇法透徹；有人認為曾俊華守住錢唔用，侯志強就認為錢要用但亦要積穀防饑，花一部分、剩一部分嘅理財理念係啱嘅；葉劉淑儀就有責任、有膽識、敢作敢為，係「唔錯嘅官員」；佢話胡官胡國興直率，講嘢無包袱，做慣法官，啱就啱錯就錯，可以直斥其非。
對於曾俊華提出研究丁屋同居屋混合式多層大廈，解決原居民同一般市民嘅住屋問題。侯志強認為曾俊華諗法創新，全港市民都可考慮，佢覺得土地本身係新界人嘅，如果唔釋放出嚟就大家都無，釋放出嚟大家都可受惠。
更多港聞
全球首創 迪士尼Iron Man模擬系統好慳電
【明報專訊】迪士尼樂園「鐵甲奇俠飛行之旅」上月11日已經正式啟用，呢個機動遊戲係全球迪士尼樂園首個以漫威（Marvel）做主題嘅遊樂設施，亦... 詳情
【明報專訊】特首選舉將喺下月開波，廉署為咗呢場選舉，推出全新編製嘅「選民/候選人支持者須知」單張，扼要簡介《選舉（舞弊及非法行為）條例》嘅重...
詳情
相關新聞
